Mihring bawk hi a ni…

- Thara Tlau

Take away my factories, my plants; take away my railroads, my ships, my transportation; take away my money. Strip me of all of these, but leave me my men, and in two or three years I will have them all again.

- Andrew Carnegie, American industrialist

Changkanna atana infrastructure pawimawh ber chu mihring hi a ni. In other words, mipuite hi changkanna hmanraw tha ber kan ni. Changkanna daltu bottleneck lian ber pawh kan ni bawk. Ram rethei leh ram hausa chu a thil neih vanga rethei emaw hausa emaw a ni lo, a rama chengte vang a ni. Ram leilung hausa deuh, a mihring awma te inngeih thei reng reng lo chu a changkang thei lo. Thlipui leh lirnghingin a tihbuai reng, mahse a mipuia te rilru puthmang dik tlat, thawhrimna ngaisangtute ram chu ram zahawm leh hausa a ni thei tlat thung.

Japan ram khan Indopui Pahnihna (WW2) kha a chhiatpui khawp mai a, a dinchhuah leh mai rinawmloh khawpin a chia. An rama hnathawkthei tur thalai rual a nuaih tel indona avangin an thi a. Indonaa kal ve lo nunau leh kum lama upa pension age rual ho kha a dam tam zawka te an ni. Atom bomb-in an khawpui pawimawh pahnih a tihchhiat nasat zia te kha kumkhuaa dinchhuah leh theih tawh lohna tur khawpa nasa leh rapthlak a ni. Mahse, an dingchhuak leh. An dingchhuak leh mai ni loin Indopui Pahnihna zawh atanga kum sawmthum vel lek 1978 ah chuan khawvela economy lian ber pahnihna an ni leh der mai. Asia-ah mai pawh ni loin khawvel puma ram hausa ber pahnihna an ni leh a nih chu.

Germany pawh chuti tho. Indopui Pahnihna avanga a ramin a chhiat phah nasat zia kha. An khawpui lian ber ber te kha ancient civilization ang maiin rubble hlirin a khat a ni mai. An mipa te lah an thi hnem, hna thawk tur mang an awm lo. A damchhun tam tak lah prisoner of war an ni. Chutah tak chuan le, an hnam ropui zia a lo lang. “Khai aw!” tiin chung rubble lak ata an ram leh hnam hai chhuak a, thian fai a, tungding leh turin an hmeichhia te an rawn penchhuak. An ram khawpui indo laia bomb chhiat te chu an hai mam a, an thawm tha a; an ram thi mek chu an tuamhlawm a, an chhanhim leh a ni. Heng hmeichhia te hi ‘trümmerfrau’ (rubble woman) ti a koh hial an ni. An ram lo dinchhuah leh nana hnarkaitu an ni. An hnathawh ropui zia hriatreng nan leh anmahni chawimawi nan monument German khawpui hrang hrang ah an din nual a ni. Khati khawpa indopuiin a tihchhiat kha tunah chuan Europe rama ram hausa ber an lo ni leh der tawh.

Chutih laiin ram tam tak, ram leilung hausakna ngah tak tak, erawh chu an ram hming sawi hrehawm leh zahthlak khawpin an rethei. An ram mipuite rilru puthmang dik loh vang a ni tlangpui; corrupt minded kan ti mai ang chu. Rilru puthmang dik lo chu an inngeih loa, an thatchia a, an initsik tawn a, engti kawng paw’n changkanna an hmachhawn thei lo. Hmanni deuh khan Buckingham Palace-a Queen Elizabeth-i nena an inkawmnaah British Prime Minister David Cameron-a chuan Nigeria leh Afghanistan ram te chu ‘fantastically corrupt’ a ti thlawt a ni. PM Cameron-a tawngkam chu undiplomatic viau mah se British news media te paw’n an hrethiam khawp mai. Pakhat phei chuan heti hian a ziak: The prime minister's remarks were outspoken and unguarded but they were not untrue. Heng ram te hi ram leilung hausakna ngah tak, ram lian tak an ni. Mahse, tumahin an ngaisang lem lo, an ram mipui te an pachhe tlat a. Tin, an ram a buai reng bawk a.

Kum zabi 20-naa management thinker ropui bera chhal theih Peter Drucker-a chuan, “The developing countries are not underdeveloped, they are undermanaged,” a lo ti. Ram enkawlnaa mawhphurtu a mipuia te a puh na hle tihna a nih chu. Ram rethei chu a ram neitu mipui te vang, hruaitu an thlan thiam loh vang, hruaitu an neih that loh vang, a mipui nawlpuiin an zir loh hrim hrim vang tihna a ni vek mai. Ram manage tute chu mihring ni miau hek, ramsa ni lo a! Sorkar chauhin a manage lo a, mipui activity hrang hrang hi ram manage naah chuan a tel vek.

Tlar hmasa bera ka'n tarlan ang khian American industrialist ropui Andrew Carnegie, khawvela university tha ber pawl Carnegie Mellon University founder ni bawk, chuan changkanna hmanrua atana mihringte pawimawh zia a lo hmu chiang khawp a. A thil neih engkim mai kha miin chhuhsakin kutruakin kalsan mah sela, a mihring a te ber, a chher hriam sa, anmahnia confidence a neihsa a te kha an laksak loh phawt chuan kum reiloteah chutiang thil te chu a neih leh theih vek a inring tlat a ni.

Mimal chu kuttlingloa sum lalutin emaw vanneih vang hrim hrimin emaw a hausa thut thei. Ram erawh taimakna leh thawhrimna tel loin a hausa thut thei lo. Ram hausak nan shortcut a awm lo. Ram changkan nana thawkrim tur te chu a ram mipuite an ni. A mipuiten an tum tak tak a nih phawt chuan ram chhengchia leh thlaler a awm lo, a changkangin a hausa tho tho.

*Kum 2016 khan Sabereka Khuangkaih magazine ah chhuah a ni e.