Hard Rock Cafe

**** Hei chu Sap tawng lo deuhin, chhiar lo tur turin an lo chhiar keng kung palh ang :-) ****

Ka naupan lai, han ti ve khanglang ila, sande sikul ah chuan junior department vel ka nih lai a niang chu, ka nu'n secondhand dawr ah t-shirt min thin sak a. Chu t-shirt chu nainawk rawng a ni a. A hmaah hian "Hard Rock Cafe Chicago" hi a in ziak kuau mai a. Chu t-shirt chu ka ngaina em em a. Hard rock ka ngainat vang emaw a restaurant chain ka ngaihsan vang phei chu a ni hauh lo, Hard Rock Cafe hi engnge a nih pawh ka la hre lo. T-shirt tha dang ka neih lem loh avangin t-shirt hakna hun awm ah chuan ka ha deuh zel a. Kha t-shirt kha mithenkhat tan chuan min chhinchhiahna remchang tak a ni ta ve ang. Zah nachang pawh ka hre hran lo, t-shirt mi zinga infiamna ni lem lova han hak chi ka neih chhun a nih avang khan ka ha kual ka ha kual a.

Ka theihnghilh theih miah loh pakhat chu, vawikhat chu ka nu hian in unauin photography studio ah thla i va la ang u a tia. Kan uite Puia chu kan hruai phei a, uite pawm chung chuan kan unau thum chuan thla chu kan la a. Chu thlalakna ah chuan ka Hard Rock Cafe t-shirt leh ka jean dum, ka thulkhung, chu ka ha a. Thlalak chu a lo chhuak a, kan unau chuan nalh hi kan inti ve em em a. Kha t-shirt kha a nghawng a pawr chuap thleng, a rawng a dak rak thleng khan ka nei a ni.

Hmanni ka inkhawm tur motor te a ka tlan chu MG Road (Bangalore) thlen dawn chiahah tunhmaa Barista awmna thin ah khan Hard Rock Cafe Bengaluru ka hmu nawlh mai a. Ka t-shirt leh thil tam tak min hriatchhuah tir a. Ka ui ka duh em em Puia te ka mitthla rum rum a. Hei chu ka hman hmasak berah a thla ka va la ngei ngei ang ka tia. Tichuan, ka hman hmasak berah a thla chu ka va hmet ve ta chuaih chuaih mai ringawt a.