Mamuan, ka thiamloh a ni…

pic source: photos.somd.com

Mamuan, ka thiamloh a ni…
(a short story) - Thara Tlau

Inrinni zan thiante ina “weekend” hmanga ka leng chu nuam hle mah se zan dar 12 a lo rik dawn tawh avangin haw zai ka rel ta a. Bangalore-ah chuan zan dar 12 vel hi weekend-ah chuan “lenghawn ar” khuan hmasak khuan hun a ni reng a. Tichuan Kamanahalli atang chuan ka tlan haw ta vang vang a. Cantonment Railway Station atangin Indian Express Circle ka pan phei a. Chutia ka tlan pah chuan ralkhata Circle sira street light eng hnuaia nula mahnia ding hi ka hmu thei a. Ka’n tlan hnaih zel chuan Mizo nula ni ngeiin ka hria a. A bul hnai ka’n thlen chuan a hmel chu chiang takin ka hmu thei ta a, kan thenawma awm thin Mamuani a lo ni reng mai a.

“Mamuan, zan reiah mahniin hmeichhia lehnghal eng nge i tih? Nghah i nei em ni? Hawh, ka va thlah ang che, rawn chuang rawh.”
“Aw, ka nau a bang har deuha min rawn lam rawh a ti a tah hian ka lo nghak a nih hi. Thlah ka ngai love, ka lawm e.”
“Chuti a nih chuan ka hmanhmawh chuang lova ka lo nghahpui ang che.”
“A ngai lo. A rawn chhuak tep tawh ang. Weekend ah hi chuan an tlai thin a.”
“Hmeichhia mahni chauha zanlaia hetiang hmuna din a him love. Inthlahrun a ngai lo, ka lo nghahpui hrih ang che.”
“A ho mai mai e… Eng ka ti lovang min ngaihtuah duh suh. Min haw san rawh. Mangtha le.”
Chutia nghahpui ka ngai lo a tih talh takah chuan ka tlansan ta a.

Mamuani leh a nau Rintei hi ka unaute tluka ka ngainat an ni a. Bangalore-a an rawn chhukthlak tirh chuan kan thenawm lawkah hian in “one bedroom” luahin an khawsa a. Ka bedroom a lut tlang ngam khawpin kan inah an tlangnel a. Keini chhung paw’n engkima kan tirh ngam an ni. American Idol leh English Premier League phei chu an tel lovin kan en thiam lo tluk a ni. Manchester United tan ulh thak an ni a. Keini lah Chelsea lo chu ti ve ngat kan lo ni bawk si. Manchester leh Chelsea inkhelh chang phei chuan boruak a sa tha ham ham thin hle a ni. Cold drinks bottle lian hi kan inchawi thin a.

An unau hi mi inkiltawih tak, inngaitlawm bawk si an ni a. An chhungkaw chanchin, a pa boral dan leh a pa boral hnua an chunga thil thleng te min hrilh kha ka theihnghilh thei lo. A pa chu city bus driver a ni a. Vanduaithlak takin an veng inkanga naupang pakhat a chhanna lamah a chesual palh a, a thi ta a. Chutia a pa eizawngtu ber a boral takah chuan a nu, lehkha thiamlo, tan chuan an chhungkaw chawmna tur chu a vang hle mai a. Aizawl khawpui daifem a khaw pakhatah a pempui a, zu thlawrin ei an zawng ta a. Tichuan Mamuani te unau chuan sikul an kal chhunzawm a. Mamuani’n Aizawla high school an kal laia an khaw hming sawi a zahthlak thin zia leh an hmuhsit thin zia a sawi kha lainatawm tak a ni. An zirtirtu te takngial paw’n an thlavang hauh ahnekin “naktuk chu fun khat mi rawn ken ta che” fiamthu deusawh takin zu han ti thin a! Chutiang hmuhsitna karah chuan high school chu tha takin a zova, in lamah a nu a pui thin ta a.

Ni khat chu an khuaah chuan vanduaithlak takin Aizawl veng pakhat tlangval hi “eng emaw” vangin a rawn thi a. (A thih chhan hi Mamuani paw’n min hrilh tha duh lo, ka chiang bik lo a ti tlat.) A hnu lawk darkar reiloteah chuan chumi tlangval te veng chu a khawnawtin an rawn thawk thla a, Mamuani te khua chu an rawn suasam chiam a. In te an thiah sak a, huanthlai te an palchhiat sak a. A sawi dan chuan kha tlangval kha drama party pakhata an “office bearer” ni tur a ni. Mamuani te in chu khaw tawntirh deuha awm a nih avangin an tihchhiat hmasak ber pawl a ni a.

He chanchin min hrilh laia a zawhna ho ang reng tak mah se awmze nei tak chu, “U Thar, kha tlangval kha kan veng ni lovin veng dang, Zarkawt emaw Khatlaah emaw khatiang khan lo va thi ta se kan veng an suasam ang khan an suasam ngam ang em?” a tih kha.

Chutia an awmna in ber a sawp vek takah chuan a nu chuan, “Hawh u, i putea te i bel mai ang u” a ti a. Tichuan Kolasib-a a putea chu an han phone a. Ani chuan Aizawla a thianpa punin an rawn lam a. Kolasib lamah chuan an pem phei ta a. Kolasib-ah chuan a putea te inhnuaiah an khawsa a. A nu chu a putea chuan dawr te a tan sak a. Mamuani chuan sam siam a zir a. A nau Rintei paw’n high school a zawm ve leh a.

A nu eizawnna chhawk zangkhai beiseiin Mamuani chu Bangalore-ah hna zawngin a rawn chhuk a. Brigade Road-a beauty parlour lar takah hna a hmu mai a. A nau pawh high school a zawh veleh a chah thla ve a an pahnih chuan an awm dun a. A nau pawh chuan Mamuani thawhna bul lawk restaurant changkang deuh pakhatah hian hna a hmu ve mai a. Tichuan an unau chuan an nu chu an chawm ta a. A nau chuan kum khat vel a thawh hnu chuan a thawhna aia lian leh changkang zawk restaurant, Cunningham Road-ah hna a hmu leh a. Kal velna a buaithlak avangin Cunningham Road hnaih Indian Express Circle atanga hlalo teah an pem phei ta a.


Chutia Mamuani ka hawsan chu ka ngaih a tha lo ru riau a. “Engmah a ti em nang” tiin ka mu lui a. A tuk chu Pathianni a ni a. Tlai dar thuma inkhawm tur kan nih avangin dar khatah chaw kan ei a. Chutia kan ei mek lai chuan ka mobile phone message tone chu a rawn ri keuh a. Ka’n en chu Bangalore Mizo Association (BMA) secretary atangin a lo ni a. Committee kohna a nih dawn hi ti a ka’n hawng chu ka phu dawrh a. “Mizo nula ruang char a ni a, post mortem-na tur St. John’s Hospital-ah a thei thei i kal ang u” a lo inti kuau mai. Kan secretary chu ka’n call nghal vat a. Ka hlauh ang ngei ngeiin ani chuan, “Mamuani a ni a. Rawng taka pawngsualin an sawisa hlum a ni. A ruang chu Cantonment Railway Station leh Shifaa Hospital inkara ram ruakah khan tukin zingah an chhar a” a ti ta mai. Chu chu nizana kan intawhna hmun atanga hla lo te a ni si.

St. John’s Hospital pan tura ka insiam mek lai chuan ka mobile chu a rawn ri ret ret a. Mizoram landline number hi a ni a. Ka’n pick up a.
“Thara”
“Aw, tunge?”
“Mamuani nu. I nau Mamuani misual kut tuarin a thi an ti.”
A ngawi vang vang a. Insum harsa ti tak chunga a insut ri chu ka hre thei a. Han chhan mai ngaihna ka hre lova. Ka ngawi ve reng ringawt a.
“Hei chanchin min rawn hrilh ve chauh a, hospital pan turin ka insiam mek. Helampang chu in rawn ngaihtuah a ngai loving. Buaipui tul apiang chu ka lo buaipui ang.”
“Anih leh Mamuani ruang i rawn zui ang em? A nuta neihchhun i ni si.”

Chu tak mai chuan min va han thawng nasa tehlul em! Engtin nge Mamuani ruang chu Kolasib thleng ka zui theih ang? A zahawm lutuk. Keima vang liau liaua kutpalh tuar a ni si. Mamuan, ka thiamloh a ni… i u Thara hian i tlawmngaih thin zia kha engvangin nge nizan khan ka hriatthiam loh. Misual ina an sual rawn lai che khan min rawn hrechhuak ngei dawn si a maw… i mitthla tur pawh ka hrethiam vek e. Mizo tlangvala chhiar tlak pawh ka ni tawh lo, pawnfen feng tlak lek ka nih hi.

“A theih hram chuan rawn zui ka tum ang. Mahse police case leh thil dang neuh neuh hi bawhzui a ngai dawn a. Tin, an unau bungrua te pawh ka lo va fawm phei a ngai dawn a…”


St. John’s Hospital ka va thleng a. Rintein min han hmu chiah chu mi rawn kuah a ka awmah chuan a tap ta vak mai a. Thiam ang tawkin kan han inhnem a.

Rintei hi nizana a u a hmuh zawh loh takah khan United Theological College (UTC) lamah auto-in a lo va phei a. A u a hmuh zawh loh thu leh a phone tlang theih loh thu a sawi bak chu engmah a sawi chhunzawm thei lova. UTC lamin police-ah report te pein an theih chin chinah hma an lo la a. Chuta tang chuan Rintei chuan tumah a lo be tawh lo hrim hrim a. A u ruang an chhar pawh chuan tah pawh a lo tap thei lo niin. An nuta anga an ngaih mi han hmu kha a lo tap thei ta chauh a lo ni a.

Mamuani ruang post mortem chu an han zo fel a. Embalming te an han tih zawh chuan a ruang chu kuangah an han dah a. Bangalore Mizo Christian Fellowship President-in hunserh tawite a hmang a. Chutih lai chuan Mamuani ruang chungah chuan heti hian ka intiam ta a:

“Mamuan, tunah chuan engmah sawi theih ka nei lo. Amaherawhchu, Kolasib-ah i thlan chungah ngei keimah chauhin ngaidam dilin ka la rawn kal ang.”